Кёрчю! Чыгырчыкъ Да сора эшит, Текебеш тюключюк, Эшит да ойла сен, Хата жюключюк: Мен бюгюн Ургъуй ёлтюргенме, Къошха къыйналып Келтиргенме. Аманкай Андан ашыгъыпмы Бара эдинг сен? Сабий кёзюне да Кючден илиннген Затчыкъны ёлтюрген - Кишиликди! Ол, эшта, уллу Жигитликди! Чыгырчыкъ Уллу уа болмаз эди, Дейме, тейри. Алай а таныш уучуму Эгери Сау ыйыкъ тохтаусуз Ашагъанды, Къулагъын да кючден Бошагъанды. Аманкай Маске уа болурму Сени эгеринг? Очукъмуду сора Манга этеринг? «Гау-гууду» битеу Кюшчюгю да, Жукъгъа жараусуз - Тишчиги да. Чыгырчыкъ Чыгырчыкъ Аманкайны тёгерегине, тойгъа чыгъарыкъ чёрчек жашча, ёхтем айлана кетип, тепсеп башлайды. Болур. Ёчешгенми этед Чыгырчыкъ, - Алай а, антым, Тамаша къынгырчыкъ, Сюйсе, булутха Жеталады, Учхан къушладан Туталады. Аманкай Къушла дегенинг Чыпчыкъла болурла? Бир бош хиликкя Затчыкъла болурла! Билеме сени, Айтырыкъса... Мени уа къалай Къытарыкъса?! Чыгырчыкъны эриклей, Аманкай тепсерге кюрешеди. «Ай, аман кесинг а!» - деп, ачыууна ачыу къоша, Чыгырчыкъ анга къарс урады. Чыгырчыкъ Угъай деп даулашмайма. Хар бирини Къанат тюбюне Сыйыннган юйлени Санай сау сагъат Сюелгенме, Санап бошаялмай Келгенме. Аманкай Урчукъ башчыкъладыла Сора ала, Бир бош затчыкъладыла Сора ала?! Алаймыды? Айтчы кёп созмай, Кесинг да Мындан ары озмай! Чыгырчыкъ Уллу къалаладыла Демейме мен. Алай хар юйде Онушар эмеген Жашайдыла деп Эшитгенме, Сюйсенг а - Кёрген да этгенме. «Осса!» - деп Чыгырчыкъ аякъ бурунларына турады. Аманкай (ачыудан жарыла) Чычхан балалалла, Эшш... эшта! Макъа балалалла - Ёчеш да! Чыгырчыкъ Да сен айтханда да Болур бир затчыкъ, Алай а, антым, Тамаша къынгырчыкъ, Бири ёгюзню да Ашайды, Ичип къуюну да Бошайды. Аманкай Къую деп, баям, Сен туякъ ызчыкъгъа Айтаса, къую деп - Таякъ ызчыкъгъа! Чыгырчыкъ Кече белинде туруп, Ол къуюгъа Челек бошласанг, Кюнде чыкъ къурургъа Сууну тауушун Эшитесе, Артха чыгъаралмай Кетесе. Аманкай (тауукъча къарыла) Теке сакъалдан да Къысха эди кюн! Тауукъ акъылдан да Къысха эди кюн! Хы-ыы! Чыгырчыкъ Узун а болмаз эди, Дейме, алай Бюгюн туугъан тай, Байтал болуп, тай Тапханды кеси да, Кёргенме, Тепшек бла жем да Бергенме. Чыгырчыкъ «Асса! Асса!» деп аякъ бюгеди. Аманкай (амалын тауусуп) Билмейме, Нек къууанаса? Былай да Ненге махтанаса?! Жыртыкъды эки Чарыгъынг да сени, Элекди эски Къалпагъынг да сени! Хы-ыыы! Чыгырчыкъ Алай а барама мен Къайры десем да, Алай а этеме мен Не зат сюйсем да. Жырлайма, Ойнайма, кюлеме, Кёресе, Тепсей да билеме! Чыгырчыкъ кёк жашнагъанча, жел ургъанча: «Асса! Осса!» деп къычыра, зауукъ тепсейди Хапарчы чыгъады. Чыгырчыкъ тохтайды. Хапарчы Ариу тепсегенди Кёсе Чыгырчыкъ. Тили тутулуп Сюелген къынгырчыкъ Къазан къаралай Къаралгъанды, Ол «тарс!» деп Эки жарылгъанды. Сахнадан шар атылгъан таууш чыгъады. Аманкайчыкъ ауады. Жабыу. КИМ ТАПСЫН ЖЮЗЮКЧЮКНЮ? Жомакъ оюн С. Маршакдан Ойнагъанла: Жюзюмчюк Кишиу Къаз Гурт тауукъ Гура Ынна Чыкъынжик Эл къыйыры агъач талачыкъ. Кюн ариу жайылгъан талачыкъда чыпчыкъла чюуюлдейдиле, тюрлю-тюрлю гёбелекчикле учадыла. Талада гёбелеклени къуууп ойнай тургъан Жюзюмчюк бармагъындан жюзюкчюгюн тюшюреди. Ж ю з ю м ч ю к Тёнгереди-кетди Ой, алтын жюзюкчюгюм. Тёнгереди-кетди Ой, алтын жюзюкчюгюм. (излейди) Кетди, жылтырай-жана, Энди ким тапсын аны? (жиляйды) Сакъ атлай талагъа кишиучукъ киреди да, Жюзюмчюкню къатына барады. К и ш и у ч у к ъ Жюзюмчюк, жиляма, къой. Ж ю з ю м ч ю к Ой, ким тапсын, ой-ой-ой… К и ш и у ч у к ъ Мияу-у, бир кесек сакъла, Сюйсенг а, барып жукъла. Уялмагъан тишханчыкъны, Бишлакъ урлап къачханчыкъны Тырнакълайым, тишлейим, Анда сора излейим. Кетеди. Ж ю з ю м ч ю к Ой, ким тапсын Жюзюкчюкню, Къууандырсын Жюзюмчюкню? Жан-жанына жантая, къаз киреди. К ъ а з (залгъа) «Къакъ-къакъ-къакъ» деп къычырама, Мен кёлге бара турама. Бюгюн бир къызыуду кюн, Бир кесекчик жюзейим. Жюзюмню жюзюкчюгюн Андан сора излейим. Кетеди. Ж ю з ю м ч ю к Тёнгереди-кетди Ой, алтын жюзюкчюгюм. Тёнгереди-кетди Ой алтын жюзюкчюгюм. (излейди) Энди ким тапсын аны, Саугъачыгъын ыннаны? (жиляйды) Жюжекчиклерин ызындан тизип, гурт тауукъ киреди. Г у р т т а у у к ъ Жюзюмчюк, жиляма, къой. Ж ю з ю м ч ю к Ой, ким тапсын, ой-ой-ой. Г у р т т а у у к ъ Мен нени да эслейме, Къурт-къумурсха излейме. Ариу жюжекчиклерим, Алтын бюртюкчюклерим, Тойсунла да, барайым, Жумушунга жарайым. Кетеди. Ж ю з ю м ч ю к Ой, ким тапсын Жюзюкчюкню, Къууандырсын Жюзюмчюкню? Гурулдай-гурулдай, услу гура кёбюп киреди. Г у р а (залгъа) Гур-гуру, гуру, гур-гур, Къатымдан кенг тур, кенг тур! Ынна берсе кёзлюгюн, Жюзюмчюкню жюзюгюн Ханс ичинде излерме, Жюзюкчюкню эслерме. Кетеди. Жюзюмчюкню излей ынна киреди. Ж ю з ю м ч ю к Тёнгереди-кетди Ой, алтын жюзюкчюгюм. Тёнгереди-кетди Ой, алтын жюзюкчюгюм. (излейди) Кетди, жылтырай-жана, Энди ким тапсын аны? (жиляйды) Ы н н а Жюзюмчюк, жиляма, къой. Ж ю з ю м ч ю к Ой, ким тапсын, ой-ой-ой… Учуп келип терек бутакъгъа Чыкъынжик къонады да, чыкъырдап башлйады. Ч ы к ъ и н ж и к Чыррр, чыкъырр, чыкъырр, чыкъыррр! Бир ариу айтама жыррр. Бек сюеме алтынны, Алай тапхан затымы Терк элтеме уяма, Билмейме да уяла! Ы н н а Чыкъынжик, кёп сёлешме, Излеп да бош кюрешме. Жюзюмчюк гитче эсе да, Излеяллыкъды кеси да. Жюзюмчюк жюзюгюн табады. Къууанады, къууанады Эсли къызчыкъ - Жюзюмчюк. Ж ю з ю м ч ю к (къууанып) Жылтырайды, ой, жанады Ууучумда жюзюкчюк. 21 02 84 |