ЧЫКЪЫНЖИК Къычырады чыкъынжик, Элни сангырау этеди. Гурт тауукъгъа чыкъынжик: «Жюжек бер!» - деп дау этеди. «Эй, чыкъынжик, къыркъынжик Боласа да, къычырма! Уялмагъан чыкъынжик, Былайдан кет мычымай!» ОН ЖИГИТ Беш жигит - онг къолумда, Аллай бир да - солумда. Онусу да - он улан, Он батыр, он пелиуан. АЛМА - Алмадан башха бир жукъ да Ашарыкъ тюйюлме, алчы. Бир къызыл уууртлучукъду, Кеси да татлыды балча! - Деди чёрчек Маммачыкъ. Алма алды аммачыкъ. Алмачыкъ кюннге ушайды. Маммачыкъ алма ашайды. МАКЪА БИЙЧЕЧИК - Тюненели къайдаса, Кока макъа бийчечик? Жырчыгъынгы да нечик Ариу-ариу айтаса! - Къамишли кёлде жюздюм, Тойдум ургъуйчукъладан. Кёлде жулдузчукъладан Бек жарыкъчыгъын сюздюм. Дуу жанады бойнумда Кёкню жулдуз ташчыгъы. Бюгюн ханны жашчыгъы Тепсерикди тоюмда! 07.09.06. |